-Mungkin sebahagian bosa pembaco kito tak dapek bayangkan tompet, suasano keliling dan oghang2 yg ese tulih kek sini, macam ISHS. Anggap yo lah macam maco buku ceghito. Tak pek nak nolong eh doh.
-Disobabkan statistik Jokiden dan MCC kompomkan tontang ghamai pembaco kito ni, memang oghang yang kito tak beso. Mako terpakso lah ese buek ketonghangan sikit tontang pokagho2 tertontu yang ese ghaso oghang susah nak paham.
-Anak dagho sunti main pondok2 tu tak do doh. Sajo yo nak buek oghang tertanyo2. Nak boghi oghang mengagak ngagak ‘an , konon eh MD lah tu..macam kato Jokiden.
-Aghi tu dah siap dah ceghito ese ni. Tongah tongah buek tu, puppp..blackout pulak. Nyosa tak save.
…sambong balik…
Oghang tu di panggil Tok Mansor. Kulit eh hitam pekat. Tompi berwajah melayu. Dikhabar dio tu pandai ngubek’an oghang. Kigho eh Tok Pawang yo lah. Kok badon sakit sakit ko, domam ko, kono sampuk, kono ketogo’an ko, jumpolah dio. Sampai kono tebok kek kambing pun jumpo dio.Mintak lah dio tawa’an air. Nak tawar’an pakai sigheh pun buleh. Kok tak kobah kobah ,mintak dio kobehkan. Dio pun buek yo ngobeh’an oghang ni. Kobar eh komat ‘an oghang pun dio pandai. Tah iyo ontah tidak.
Ese maso kocik maghin tu, kok lamo domam, tak mau elok elok kono yo berkobeh. Cagho eh sonang yo. Pesakit dimintak dudok melunjur’an kaki ko muko pintu. Lopeh tu Tok Pawang pun keluar’an kain itam eh. Ado lah selebar kain cukin. Dikombang’an kain tu, lalu diheghet kain melalui daghi belakang kita sampai kodopan di ujung kaki. Tigo kali lalu kek tongah, eteh kepalo. Tigo kali lalu kek bahu kanan dan tigo kali kek bahu kighi. Last sekali, yang kesepuloh lalu ditongah dan beghonti kek ujung kaki. Tok Pawang cokup kaki kito ngan kain itam tu. Mulut eh tak ngonti maco jampi eh tu doh. Penamat eh, kain tu dialih daghi kaki kito. Kito pun copek copek laghikan kaki kito daghi situ. Dio pulak mengobeh ngobehkan kain itam tu kek tango sambe ngadap keluar. Abih.
Kami dipaksa juga naik keghumah. Dipaksa juga makan nasi meskipun dah kito koba’an, kito lopeh makan di ghumah Tok Pe’et. Dio tak kigho. Dio ondak yo kito makan. Jadi gaso yo lah sesikit. Mano yang patut. Masih ese ingat gulai tolor itik campur belimbing bosi. Kuning menyalo. Sayang amek amek kita dah konyang gulai jangek. Kok tak, tau la deh sapo kito ni.
Nyambei makan tu dio bebughak bughaklah dan abah dan omak ese.
Tak lamo lopeh tu, kami mintak dighi. Matoaghi dah tinggi. Singgah pulak di tanah kubur. Ziarah kubur adik beradik ese dan arwah atuk ese.
Kami toghus’an pojalanan. Naik bukit. Selo selo (slow) yo jalan. Kami memasuki kawasan hutan pokak, bedasarkan jonih pokok balak dan tumbuhan dikeliling eh. Tak ado pokok buahan atau pokok gotah laie doh. Bukan tanah oghang ni doh, tompi tanah simpan kerajaan. Jadi jutawan sapo dapek balak tu.
Tak lamo jalan mendaki tu abah ese kek belakang sughuh beghonti dan tunggu dio sampai. Ese beghonti kek sebatang pokok bosar sepemolok beruang. Pokok tu pokok bangkong.
Nyamuk utan menyanyi nyanyi kek telingo ese. Buah bangkong tu sodang bebuah lobek. Tompi kocik laie. Duo ko tigo bulan laie, bosa lah tu dan akan diambik oghang. Itu pon kok ado yang tau, kok tak jumpo kek oghang larehlah ko tanah.
Biji bangkong memang sodap. Lomak dan ompuk. Cagho ngeluarkan bijik eh tu, sonang yo. Tughih tughih ngan pisau kulit eh, mulo daghi buntut eh. Lopeh tu di hobin ngan kayu sebosa longan. Bijik bangkong tu akan topancut keluar. Ado yang doket ado yang jauh poie eh. Kenkadang tak jumpo.
“Terlanjor dah sampai, moh kito poie nengok kobun kito.” aghah abah ese.
Kami dipandu kek abah ese menughun bukit menhalo ko bawah. Ado payo kek bawah tu. Ponoh ngan pokok keladi gata. Kami melinteh payo tu. Adolah dalam limo boleh kaki lebar eh agak’an. Di tongah eh ado anak air. Tak lebar doh. Maklum lah kek ulu. Kaki bukit di sobolah kilir. Jadi air eh mengalir ke ulu lah pulak. Tak ponah yo ese jumpo ni doh.
Meniti batang kayu yang torsedio. Agak’an laluan oghang balik motong gotah dan sampai di seboghang.
“Ini tanah ombong kau” keteh abah ese. Ese diam yo.
“Dulu kito ponah tinggal kek sini” sambong eh laie. Ese nongar yo.
“Sojak arwah abang kau ,Hashim namo eh meninggal, kito pun pindah dari sini.” Sambung lak kek omak ese.
“Ese lahir kek sini ko mak” ese tanyo omak ese.
“Tak, kalau lahir tak kek sini doh, kek sinun ah.” baleh omak ese nyambey jaghi eh nunjuk ko hulu. Ese mandang yo aghah yang di tunjok eh tu. Lokek kek mano sampai eh penunjok tu, ontahhh.
Pokok gotah, pokok dughian dan ghamutan.bercampur dalam kobun tu. Topi payo tu ado ghumpon buluh. Ado kosan ditobang oghang. Ghayo Poso dulu gak’an, oghang ambik buek lomang.
Abah ese jalan ke sempadan bolah kulu. Ado sebuah ghumah. Dio melilau caghi oghang. Lamo lamo dio pun ilang. Tak lamo lopeh tu dio balik semulo.
“Indok Sindon tak ado. Tak ado sapo tingga doh.”
“Sumah pun tak do?” tanyo omak ese.
“Sumah ado. Keteh dio’eh omak eh poie Dang Lebar”
Sajo yo abah ese nak jumpo Uwan sindon. Lamo tak jumpo sojak pindah ko Bayai. Uwan Sindon tu omak Isa Jobok. Isa memang tak tingga totap. Ngayau yo kojo eh. Oghang cam tu. Nak maghah pun tak buleh. Laie pun dio dah ghodang.
Isa maso ese sekolah dulu selalu jumpo kek Batu Kikir. Dio tingga kek balai Pulis Batu Kikir tu. Pulis pulis tu memang bolo dio. Bertugas mengalah’an pulis. Kalau ado road-block dio lah yang ngaghah’an kegheto sughuh beghonti. Kengkadang tu pulis sughuh jalan, dio pulak yang nahan. Oghang beso jalan toghuh yo. Mano tak kona, tekono. Dio plak pakai unipom pulis, siap ngan tupi sekali. Silap eh dio makan sigheh. Mano ponah kito jumpo pulis makan sigheh.
Bilo tak bertugas, Isa ni ngayau ko kampong kampong sekitar nyambey jual kain batik. Buleh tahan business eh. Yolah kadang kadang oghang kesihan, boli eh lah. Isa pun pandai yo buek muko kesian. Kawasan Seghoting, sekitar Batu Kikir dan Padang Lebar dah tontu. Kek Joseh tak tau lak ese doh. Sampai yo gak’an.
Ado satu laie kolobihan Isa ni. Ghamai oghang tak tau. Tompi ese tau. Dia pandai berpantun. Osah pandai eh.
Satu aghi dio datang Bayai. Beso eh kok datang sinun tu, dio sampai lah ko ghumah ese. Dio memang panggey omak ese Mak Ngah. Keboto’an kito duduk kek laman ghumah, ngupeh nio nyambey nongar radio. Puko dua boleh tonga aghi. Kek radio ado rancangan berbaleh pantun pulak tu. Juruhebah eh Karim Mohamad. Uyysss, seghonok boto deh.
“Kuek ‘an sikit radio tu mak ngah!, Nak nongar oghang baleh pantun.”
Radio dikuek’an. Oghang pertamo jual pantun. Isa baleh pantun tu, sebolon oghang yang boli pantun tu jawab. Hebat. Lopeh tu pantun tadi dibaleh. Pantun baleh’an oghang tu tadi, Isa pun jawab. Tokojot ese. Ese ingat pantun yang dijual yo kono jawab. Ghupo eh pantun yang diboli pun dijawab’eh yoh. Sampailah habih. Setiap pantun dijawab’eh kek Isa. Kengkadang pengacagho pun berpantun yo..itu pun dijawab’eh. Tak ado skrip, tak ado catitan. Osah handa’eh.
Boto ko tak boto pantun’eh, ontah. Tompi memang tu lah yang ese nampak dan dongar.
Laie soghang oghang mungka tu yang pandai pantun, keteh indok ese maghin tu yolah Kasin Komah. Bilo ado rumbongan nikah ko Melako kek mukim tu, dio lah yang dicaghi oghang. Koba eh sampai oghang Toghontang pun pakai dio tu, bab pantun ni. Kelobihan masing masing.
Dibagitau yo kek ese, dio pun pandai main ‘belo’ dan ‘tandak kudo’.
“Apo bondo eh main belo tu?”
“Alah yang macam nia tu hah.” Kato Indok ese nyambey mengayokan cara cagho oghang main biola.
“Oooo, main biola..”
Ceghito ado sikit laie hah. Badan dah ponek pulak. Can no nak buek tu..? Boghontilah dulu yo… Kok tak, tamat’an yo hah.
