MACO KITAB TAK BOBAGHIH - 3

Maso ese poie nikah dulu, ghamai yang tau, tompi macam tak tau. Sumo takut ambik bahagian. Tak ndak risiko. Takut putuyh hubongan dengan koluargo isteri ese.  Ese ingat laie maso nak caghi saksi untuk nikah. Sobab ese nikah kek Pejabat Kadi. Sumo ese kono sodiokan. Kono siap. Kadi datang toghuyh pogang tangan kito yo. Akad nikah. Sah?. Sah!, Sah!. Dah siap. Sonang omek kojo’eh.

Nikah kek masojid sonang. Panggey yo sapo sapo yang ado kek situ jadi saksi.  Pinjam jubah imam kojap, nak bagi oghang confident ngan kito, dah siap jadi saksi. Ese senighi pun boboghapo kali jadi saksi. Dapeklah RM 20.00 sekali jadi. Itu yang maleh tu. Kok dapek ngelak, ngelaklah. Sobab’eh kok tokono pengantin yang tak tau segalo macam. Maco Al-Fatihah pun tak ghoti. Ngucap tak ghoti. Yang dio ghoti nak nikah somato.  Abih maso duo jam.  Dapek’eh boghapo tadi?. Ciput yo. Akad nikah topakso. Kono jalankan apo cagho sokali pun.

Tak dilopeh’an laie susah.  Dibuek’eh kojo tak somonggah, kito yang tompang bodoso. Oghang kampong kito kato, dah gilo nak bokawan. Nak buek camano.

Datang kito ko ghumah jiran jiran akak ese, minta tolong jadi saksi.  Sumo jawab ‘takot’. Bodeghet ghumah tu, tak do yang ondak. Malah ajak poie ngantar nikah pun tak ondak. Ese sobona’eh tak kesah doh. Kito oghang jantan. Tompi bolah isteri ese tu. Dahlah omah ayah tak soghoto. Jiran jiran pun samo yo.

Dalam ghamai ghmai tu, ando yo yang boghani.  Wak Zakaria yang tontu’eh.  Oghang yang potamo sekali setuju nak ngantar dan malah stuju nak jadi aksi pulak. Dia siap poie jumpo pak montuo ese laie. Lopeh tu siap maghah laie. Keteh dio pak montuo ese diam yo, tak nyawab.

“ Budak dah besar simpan buat ape!”

“Kau nak marah ke, kau nak ape ke, akutak kira. Kahwin budak ni aku nak masuk campur” tegas Wak Zakaria. Dio nekad. Lopeh ni tak ndak togor dio laie pun tak kisah.  Tabik hormat ese pado Wak Zakaria sampai sekaghang.  Sosokali aghi ghayo tu poie yo ghumah dio. Bini eh Mak Iti pun tak kughang menyokong.  Tulah yang buek ese togap sikit.

Saksi soghang dah lopeh. Laie tigo. Maso tu saksi,  Jabatan Agama ondak duo oghang. Satu saksi nikah satu laie saksi pengantin. Saksi pongantin ondak sapo sapo lelaki yang konal boto kek kito. Cam tulah.

Bilo coghito kito nak nikah dah heboh sokoliling tu. Malah coghito sumo oghang tak ondak ngantar pun dah tosebar.  Tongah kito ngayau ngayau jauh sikit, nak caghi oghang jadi saksi, tiba tiba datang soghang kawan ese.  Kawan ni tak lah ghapat bona doh.  Kona cam tu yo lah.  Maso tu dio masih kojo kek TUDM. Jiran dan Kobotolan ghumah dio seboghang jalan, boghadap’an dongan ghumah pak montuo ese.  

“Aku dengar kau nak kawin, tapi tak ada oghang nak jadi saksi” tanyo dio kek ese.

“Ye” suleh ese jawab

“Biar aku jadi saksi. Oghang tua tu memang aku pun  tak kenan dengan perangai dia”  ghupo eh ado masalah hubungan antagho dio boduo tu.

“Kau kawin je, aku sokong” tambah’eh laie. Nada eh macam gogham yoh.  Logo ghaso ati ese. Lopeh tu ese tanyo abang ese, sanggup tak jadi saksi. Dio sanggup. Walau pun dio bolon nikah laie. Jadi saksi pengantin lelaki buleh lah. Jadi saksi nikah pun buleh yo, kok tak dapek jumpo oghang lain. Tompi apo pulak ghoman eh.  Oghang bujang jadi saksi.

Buntu kopalo ese mikir’an. Sapo laie nak caghi.  Dalam pado tu akak ese pun ketiar’an yo lah. Mano tau kok jumpo oghang yang sanggup. Kok buleh biarlah jiran jiran. Jauh atau pun dokek.  Yang sanggup poie ngatar. Yang sanggup tak kigho dongan pak montuo ese. Tingga soghang yo laie, saksi nikah. Kok buleh, nak pilih yo sikit. Oghang eh kono ghoti yo. Somayang eh elok tojago. Kang ditanyo’eh kek kadi kang, tak ghotilak nak nyawab. Ontah lah. Bosa onggap ese koluar.

Dalam pada tu akak ese tanyo, tak do koh, kawan kawan kek tompek kojo ese yang buleh tolong.  Cubolah tanyo tanyo.  Ese ughut satu satu kawan ese kek tompek kojo. Tak do ghaso ese yang buleh diaghap’an doh. Kok buleh cumo En Usop. Yo Encik Usop. Oghang’eh dah beghumo sikit akhir 40an. Oghang Kuala Selangor. Tompi ghoti adat popatih. Selalu jadi tukang nyoput pengantin lelaki, bilo ado nikah kawin bolah oghang ghumah eh. Oghang ghumah’eh oghang Sonanti.  Cakap dio pun dah macam cakap ese. Solalu ese bobughak dongan dio, guno cakap kito yo.

“Encik Usop!, ado ajat sikit ni”

“Hajat apo pulak, Kau nak nyomput aku datang nikah kau ko?” tukas dio dalam bahaso kito. Tompi dio masih mombahaso’an dighi’eh ‘aku’. Kekok agak’an eh nak pakai ‘eden’ atau ‘ese’

“Eh, mano En Usop tau?.”

“Ahh tulah kau, solalu pandang ghondah kek aku ni. Sokali aku pandang muko kau tu, aku tau kau nak nikah”

“Botol lah tu, memang ese nak nikah aghi jumaat ni, lagi tigo aghi.”

“Mak we yang dulu tu ke?”

“Yang lain..” keteh ese sikit. Lopeh tu dio ngangguk ngangguk’an kopalo eh.

“Ado gak oghang ndak kek kau ni  ye”  Usik dio. Ese jawab ‘oghang buto pun ado yang ondak’. Ese tambah laie ngato’an ‘ese ni lawa tak do, tompi manih. Manih sikitlah. Banyak kang kono koncing manih pulak. Lalu ese kato’an hajat ese kek dio.

“Kau punya pasal, anytime.”

Syukor. Dah solasai caghik saksi.  Ese bagitau dio tontang tompek dan maso eh. Jumaat. 10 Syaaban 1409H. Pukul 2.00 atau selepas solat jumaat. Pejabat Agama Islam Daerah.

Akak ese datang, copek copek caghik ese. Topoghanjat ese. Nyaghih nak totolan puntong ghokok kek muncong ese. Dia nak bagitau yang pak montuo ese dukung anak ese dan bowak poie jalan jalan. Ese diam yo nongar’eh. Tingga ese soghang laie lah yang tak jumpo oghang tuo tu. Tah bilolah tu.

Lambek sikit balik’eh oghang tuo tu. Mak montuo ese jadi ghisau. Apolah dibuek’eh kek budak kocik tu. Koluar kek jalan dopan ghumah monghalo aghah kodai.  Daghi jauh nampak suami’eh monukong cucu’eh kek selekoh ujung jalan monghalo koghumah.  Sonang ati’eh.

Tongahaghi tu waktu pak montuo dan mak mentuo ese sodang makan nasi datanglah soghang sedagho’eh kek ghumah tu. Lalu diajak’eh masuk dan makan sekali. Makan lah deh botigo tu.  Ditengok’eh ada isteri ese dan anak anak ese. Dio tak nampak ese. Tompi dio paham. Lalu ditanyo’eh.

“Menantu tak balik bang?” sonyap sokojap pak montuo ese, bilo kono soalan cam tu.

“aaa..dia tak datang, dio kerja hari ni” jawab pak montuo ese. Nampak macam confident yo. Mak montuo ese pandang sipi kearap suami’eh.  Lopeh tu isteri ese kato, pak montuo ese tukar topic coghito. Tulah kolobihan pak montuo ese.

Bilo ese cakap ngan akak ese, ese nak nikah maghin tu, akak ese sonyum.  Tokulom kulom sonyom’eh.

“Anak dagho mano?”

“Oghang dokek ni yo!” keteh ese. Akak ese mulo suspen. Mulot’eh sepaghuh tongango.

“sapoo?” tak soba bona deh nak tau.

“Jah” jawab ese rengkas. Ese pandang muko dio. Tunggu jawapan. Lam ati ese, kok dio molonting kang susah ese.  Tengok muko memang dio nak molonting. Tompi dio konal bona kek ese ni daghi kocik laie.  Kogheh kopalo. Bogiek.  Susah nak toghima cakap oghang.  Dio tahu ese tak bunyi dan tak togor pak sedagho ese ,adik omak ese sojak daghi ujung tahun 74.  Sobab’eh…..masalah koluargo.

Lamo akak ese diam. Ese dosak dio ‘cam mano?’.  Apo pondapat dio. Bilo nak minang. Sapo nak poie minang. Bilo nak boghi ese ni nikah. Banyak soalan. Poning akak ese. Nak buek koputusan pulak, kojap kojap tu yo. Ontok seontok’eh. Topoghanjat satu laie sobab’eh. Mikir’an ayah budak pompuan tu satu laie bab.  Dio memang konal boto. Yolah jiran’eh.

“Kito poie jumpo Ombong” Itu yang tokoluar daghi mulut akak ese. Ontah songajo ko, ontah panik, tak tau lah ese tu doh. Ati ese ngato’an lobih pado panic.

Ese setuju cadangan’eh.  “Bilo nak poie jumpo?”

“Duo tigo aghi laie, kito poie lah jompo..” usul akak ese.

“Po lak lamo na? tanyo ese, tak boghapo sotuju.

“Kau nak nikah bilo nii..!!” tinggi sogho akak ese.  Bonghih lak deh.

Ese mongalah bilo tune sogho akak ese dah naik.  Ese kato’an sotuju yolah bilo bilo. Tompi akak ese dah mulo maco kitab’eh yang tak bobaghih. Ese angkek buntut, koluar. Tak koso nak layan’eh doh.

Malam esok’eh tu, akak ese ajak poie ghumah ombong ese.  Ese heghet koluar moto jipang ese koluar.  Start enjin.

“Kato somalam, tigo aghi laie nak poie!” sajo yo nak test akak ese.

“Dah tu, kau tak soba soba bona…” baleh akak ese sambey mombonceng ateh moto.  Ese diam yoh.  Bukan maleh nak cakap doh, tompi kopalo ni mikir’an camano nak cakap dopan ombong ese nanti.  Positif ko negative gak’eh.

“Ese nak cakap sikit ngan ombong ni hah..” kato ese bilo jumpo ombong ese dalam ghumah dio.

“Cakaplah..” jawab ombong ese.

“Acu ni cadang’eh nak nikah hah” copek copek akak ese potong trip. Takot dio’eh jatuh reputasi.  Dio tak ondak ngikut yo doh. Dio nak kodopan. 

“Hah..ngan sapo?” Sikit topoghanjat ombong ese.

“Ngan si Jah, anak oghang Acheh dopan ghumah ese tu”  keteh akak ese bodobar dobar.

“Si Jah tu..” 

“Iyo!” ese pulak nyawab.

Langsong sonyap ombong ese. Ontok.  Ese ontok.  Akak ese pun ontok. Sumo tak bodotik. Tompi jam kek dinding’eh sontiaso bodotik.

Lam ati ese sonang yo, kok ombong ese tak sotuju. Tak apo. Macam jam kek dinding ghumah’eh tu. Satu baghang pun dalam ghumah tu tak bodotik. Tompi jam toghuyh yo bodotik. Cam tu lah ngaso ese.  Ese piker, ese ni anak jantan. Memang anak jantan pun. Sekor ayam tak bokokok, aghi akan siang yo.

Ombong ese lak sonyap yo.  Lamo deh sonyap. Tak sotuju ko? Takut ko? Tak elok ko pilihan ese tu.  Kojap kojap taghik ongap’eh.  Kojap kojap taghik ongap.  Ando lah dalam tigo minit gak’eh. Tompi ese ghaso tigo jam.

Ado sikit laie .. tunggulah kok ondak maco'eh.

MACO KITAB TAK BOBAGHIH - 2

Kito sambong balik. 

Solang duo minggu lobih kurang, sampailah mak mentuo ese ko ghumah ese.  Togamang ese.  Copek copek ese sambut dan salam dio.  First time jumpo montualah katokan. Moghaong oghang ghumah ese.  Mintak mahap, mintak ampon banyak banyak.  Ese pun samo. Tak do niat nak kughang ajar doh.  Sapolah kito ni. Ghoto tak ado, budi baso pulak, tulah ghupo eh aah.

Air montik montik,

Titik eteh batu,

Muko tak cantik,

Poghangai macam antu.

Tompi memang ese nak nikah yo maghin tu. Ese tak kigho. Ese ondak  yo.. dah gata bona dah agak maso tu. Laie ghamai molaghang laie ese ondak. Sampai kono kato’an ese ni dogey nak mampuyh lah. Tak po, janji ese dapek nikah.

Datang Mak Cik Minah bilo didongar’eh  bunyi ghioh ghondah oghang menangis.  Disobar’eh lah kito sumo ni. Tak elok macam tu, keteh dio’eh. Awak tu baghu lopeh bosalin. Bontan kang, sapo susah.

Yolah dah lamo tak jumpo ngan omak’eh. Sojak lopeh nikah ini kali potamo jumpo.  Last kito jumpo maso nak poie nikah ke pajabat kadhi dulu.  Jumpo cagho nyughok nyughok dalam ghumah Wak Zakaria, jiran mentuo ese.  Nak mintak izin dio, supayo morostui ponikahan kita dan kokal idup boghumah tanggo sampai akhir hayat.

Montolahan laie ayah eh dah kato maghin tu. “Kahwin tak lama tu. Aku bagi tempoh tiga bulan aje, berpisahlah”

Tulah dalam maso tigo bulan tu, comeh yo ghaso eh. Bacolah sesikit apo yang dah belajar maghin tu. Yolah. Yang bocakap tu bukan sebaghangan oghang doh. Tinggi ilmu’eh… Oghang Acheh.  Bolando pun kalah. Kito beso tengok oghang ghamai datang nak beghubek kek dio.  Camacam penyakit. 

Potang tu montuo ese balik. Tah bilolah nak jumpo laie tu, ontah.  Mintak2 biarlah selalu jumpo. Apotah laie skaghang ni dah ado cucu.

Bogitulah idup ese. Lobeh kughang.  Malu sobona’eh nak cito kek oghang.  Kigho’eh  pelawat blog kito nilah yang first sekali dapek nonga.  Anak anak ese pun kok nak tahu lobeh lanjut silo lawat  http://smbkns.blogspot.com/ . Tu yo lah.

Setahun lobeh lopeh tu, datang call daghi mak montuo ese. Sughuh datang ko ghumah dio. Keteh dio’eh. “Ayah kau tak ada di rumah,  ada orang bawa pergi ke. .(jauh).…. untuk berubat, besok baru balik”.   

Pucok dicito ulam pun tibo. Ese pun anta isteri ese , poie ghumah omak dio somalam.  Bowak anak sekali.  Biarlah dio oghang tu molopehkan ghindu dondam. Montolahan laie cucu portamo.  Bololah dio nyambut bilo kito sampai.  Ese balik ghumah somulo. Dapeklah oghang tuo tu somalam tidor ngan cucu’eh.  Abih anak beghanak dan sodagho magho eh datang.  Esok tu ese jompot dio balik somulo koghumah.

“Malam tadi risau, tak boleh tidur.  Takut ayah balik mengejut. Mesti dio akan kata macam macam. Apatah lagi datang semasa dia tiada dirumah” adu isteri ese kek ese.

Lopeh daghi peritiwo tu ghamai sodagho magho  eh yang jumpo ese, minta ese balik (sobonar’eh - poie) ghumah mentuo ese tu. Tingga’an yang koghoh ambik yang joghoneh.  Ese kato, ese tak do masalah. Ese laie goma.  Tompi yang ese tak goma tu, cam nak nyalah’an ese yo nampak’eh.

Adolah sekali duo lopeh tu, isteri ese balik ghumah omak’eh bowak anak ese tadi.  Maso aghi siang. Sokali tu tojumpo kek ayah eh yang balik ghumah tibo-tibo. Maso tu anak ese dah pandai cakap tapi masih pelat laie. Dah ado pulak adik’eh. Lelaki. Masing masing lam ghumah tu ontok. Sumo macam muko tosampok    antu-manjangan..   Dipandang’eh ado lak budak kocik soghang. Dio sonyum kek budak tu. Membongkok deh, dicolek’eh pipi budak tu. Budak kocik tu pulak torsonggeh kek dio.  Omak montuo ese tengok yo, laku oghang tuo tu.  Lalu dio monyampok.

“Anak  Jah tu bang..”

Boghubah muko oghang tuo jantan tu.  Kocolo’an.

Oghang ghumah ese keluar daghi bilik adik’eh bilo todongar ayah’eh balik.  Bila dio nampak oghang tuo tu, lalu dio poie dokek.  Disalam dan dicium’eh tangan ayah’eh. Topaku ayah’eh kek tongah ghumah tu.  Agak’an nak ngelak pun tak sompek gak’eh atau memang dio dah tak bongih laie kek anak’eh.

 Lalu dio poie kodapor.  Kojap yo, lopeh tu dio koluar ghumah.

Malam tu dio tanyo mak mentuo ese.  “Sapo suruh dia datang?”.  Abih gitu yo. Mak mentuo ese tak melawan cakap dio tu. Tak koso nak bogadoh. Banyak kojo lain laie.

Sojak tu ese koghap poie ghumah akak ese. Nyambey tu poie ghumah omak mentuo ese, kok pak mentuo ese tak ado kek ghumah. Bomulo daghi aghi tulah, sumo oghang dalam ghumah tu, campor ese laki-bini ngejek’an kek anak ese tu ‘atuk’.  Sikit sikit ‘atuk’.  Sikit sikit ‘atok’.

Bilo kami jumpo gambar ‘atuk’ kek album ko, kek dinding ko, kek mano mano yolah, toghuyh kito sobut “ atuk” . Dan kami diboghi sokoping gambar ‘atuk’ untuk buek main ngan anak ese kek ghumah.  Kek ghumah kito lotak’an kek eteh meja gambar tu.

“Ini sapa?” tanyo kami laki bini.

“Atukkk..” jawab anak saya.

Kadang kadang kito sughuh dio ajak ‘atuk’ maso nak makan, walau pun cumo pada sekoping gambar.  Lamo lamo anak ese ni paham dan kona, wajah sobona ‘atuk’.

Sesekali  ese kerumah akak ese, oghang ghumah ese tak dapek poie ko ghumah omak eh. Sobab ayah eh ado ghumah.  Bilo nampok yo ayah’eh koluar daghi ghumah, toghuyh disughuh anak’eh panggey ‘atuk’.  Tompi ayah’eh tak dongar panggilan tu atau dongar gak’eh, tompi sogan kek jiran jiran’eh.  Copek copek dio hilang’an dighi daghi pandangan kito.

Yang sodap’eh tu, anak ese mahu yo manggey ‘atuk’.  Sesekali kita tanyo dio.

“Tu siapa?”

“Atuuk”

Bolanjutanlah macam tu. Agak lamo yo. Sampai anak ese kona sungguh ‘atuk’eh.  Sampai dio meghajuk pun, bilo sobut yo ‘atuk’ toghuyh muko’eh ceria.

Satu aghi yang bahagio. Tontang potomuan atuk dan cucu. Ditakdirkan Tuhan, oghang ghumah ese bowak anak ese tu poie keghumah oghang tuo’eh.  Maso tu anak dagho ese dah pandai bojalan senighi.  Isteri ese monukong anak  ese yang koduo.  Lopeh senighilah budak tu jalan dulu. Bololah deh poie ghumah atuk/nenek’eh.  Dio sampai dulu.

Waktu tu aghi bolun luhor laie doh. Beso’eh maso tu ayah’eh tak ado dighumah. Dio poie pasar dan toghuyh masak dikodai’eh.  Tompi tah macamano tah, aghi tu dio tak boghapo sihat. Tak boniago. Adolak kek ghumah. Ayyo.

Oghang ghumah ese memang tak tau.  Anak dagho ese pun tak tau. Anak ese yang sodang mencengkong kek pinggang omak’eh tu pun tak tau. Sampai yo kek ghumah tu, anak ese topandang ‘atuk’eh. Oghang tuo tu pun topandang dio.  Spontan anak ese borsogho.

“Atuuukk….”

Tokomamau pak mentuo ese. Po laie lopeh tu, anak ese tadi bolalah poie kek dio lalu dipogang’eh tangan ‘atuk’eh.  Tak kan nak dighontap’eh tangan budak tu doh. Lalu dipogang’eh kopalo anak ese tu. Agak’an lam piki’an dio tu ‘anak sapolak ni’. Atu pun dio tau, tompi tak atu nak buek apo.

Lopeh tu dio poie kodapor,  anak ese tadi toghuyh ngeko dio kodapor.  Keteh oghang ghumah ese, kojap kojap dio panggey ‘atuk’,  kojap kojap dio panggey ‘atuk’.

Totibo pak montuo ese nampak oghang ghumah ese. Ontok yo deh.  Air muko’eh sikit boghubah.  Osahlah anak tu anak cucu’eh.  

Ghosah ‘atuk’ eh. Tak lamo keluar la’deh.  Anak ese ni toghuyh ngikut dio.  Ayo botolah. Camano nak buek tu. Omak’eh panggey dio.  Dio buek tak tau yo.  Pak montuo ese boghonti dan bopaling kek budak kocik tu, bilo dighaso’eh budak tu ngikut dio.

“Adik balik yeee, atuk nak jumpo kawannn” ayat potamo koluar daghi mulut pak mentuo ese.  Tak secagho langsung mengiktiraf diri dio sebagai datuk kek budak kocik tu. Isteri ese poghati’an yo sogalo poristiwa yang bolaku dopan mato’eh.  

Budak tu masih bokogheh nak ngikut, malah mongulor’an duo duo tangan’eh ko eteh mintak didukong.  Ghamai jiran jiran mentuo ese mandang. Pak montuo ese pun, agak’eh pun poghasan ado oghang mandang kek dio. Lalu disauk’eh duo duo bolah kotiak anak ese lalu didukong’eh. Borjalan komuko pintu dan jongok’an kopalo kodalam.  Toghuyh topandang isteri ese yang kobotolan memang tengok dio daghi tadi.

“Ayah bawak anak kau ke kedai ye.!”  Hajat ayah’eh  tu tak dijawab kek oghang ghumah ese doh. Yang mampu cumolah mengangguk nganggukkan kopalo’eh yo.  Lalu di bojalan sambey menokung anak ese tu, melalui dopan ghumah jiran jiran tomasok dopan ghumah akak ese. Lalu di togor’eh kek akak ese.

“Kemana bawak budak tu bang”

Memang akak ese ambik peluang boto.  Sindir tu. Dio memang gogham daghi dulu laie. Apo laie sokaghang dapek poluang. Yang paling dio gogham bona maghin tu yolah somaso lopeh balik daghi nikah kek Pejabat Kadi. Maso tu dio monunggu kek dopan ghumah akak ese. Sampai pukul 12 malam. Niat nak buek perhitongan dongan ese.  Nak puko ese. Nak bagi tau kek ese dan jiran jiran, bahawa dio jangan buek main. Nak boghi  tau dio oghang Acheh. Nak boghi tau kito, bahawo Bolando pun kalah. Ahhh macam macamlah. Omat aka ese.

Ese rilek yo. Kok dah takdir’eh mati, matilah. Ese masih ingat koba abah ese dulu tu, kok tak nak mati jatoh kepalo dulu daghi pokok nio pun, tak mampuyh doh. Tompi akak ese comeh. Simpati amek amek ese kek dio’eh.  Ese punyo kohondak dio yang tompang susah.  Tak tidor akak ese malam doh. Ese pun tak yo todo doh...

Tosonggey  yo pak montuo ese bila akak ese tu monyapo dio.  Tak dijawab’eh soalan akak tu ese doh.  Tau deh oghang kenen dio. Dio jalan toghuyh kodopan nyambey moncengkong cucu’eh.  Semuo jiran yang ada kek luar ghumah tengok sesajo. Tak boghani nak nogor, macam maso nak poie nikah dulu.

Sambong lain kali. Jumaat dopan lak kok sompek nyiap'an . Lopeh ni kito nak masok bab poso lak. Kongkawan kono yo buek posting. Kok tak sok laghi pelawat kito. Hheheehhe Ese ni siang siang ado maso sikit. Malam malam susahlah sikit. Duit tak banyak dikigho doh, tompi utang banyak, tu yg kono nak dikigho tu.