Ese ingat maso kocik2 maghin tu, lomang adolah hidangan yang ditunggu2 somaso musim ghayo. Makanan tradisi oghang kito. Ado orang tak buek penganan, ghojit dan lain2 makanan ghayo lantaran komiskinan, komalehan, ponyogan atau tak boghapo ghoti buek’eh, walau bagaimano pun sumo oghang buek lomang bilo nak mogang atau nak ghayo. Kek situlah kehebatan lomang ni.
Bilo kito ghayo daghi ghumah koghumah, kito akan ghaso lomang oghang lain lobih kughang macam lomang ghumah kito yo. Cumo kok ado yang membezo’an lomang kito dongan lomang oghang yolah ghaso garam’eh, lomak’eh dan ghupo eh. Ado oghang maleh nyago api’eh, lomang’eh kogheh bokoghak. Lotih ghaham mulut ngunyah’eh. Apo laie kok guno buluh nipih (buloh tolor) Yang guno buloh lomang tu memang cantiklah masak’eh. Kok pakai buloh yg toba kulit’eh, kono pulak kito kupeh dulu baghu deh elok masak’eh. Kok tak dikupeh pulak, mahu duo aghi baghu masak lomang tu kang.
Maso tulah ado yg dah lupo camano nak muek’eh. Sotahun sokali, lupolah. Tompi sokaghang ni lomang bilo2 buleh dapek. Kek mano2 yo, adolah yang jual lomang. Sopanjang tahun. Ghaso’eh sodap ko tidak, ikut solegho masing2 lah. Selalu’eh lomang yg jual topi jalan tu, jaghang yang jumpo ghaso’eh yg ori. Masing2 mondakwo lomang itu, lomang ini sodap. Bilo kito ghaso plak, jawab’eh ‘yang sodang2 sajo’. Tak po yo doh. Kok nak muek’eh laie susah. Paneh dokek api ompek lima jam. Tu pasal lah bilo poie ghayo kek kg, tughuyh toghokam lomang yo.
Apo bezo lomang yang jual topi jalan tu dongan lomang kito kek kampong.
Santan’eh tak lomak tompi bominyak. Oghang skaghang ni pakai nio masak. Oghang tuo kito dulu ‘nio lomangan’. Nio lomangan ni yolah nio yang mulo nak masak tompi bolon koghing laie sabut’eh doh. Ghaso’eh ado manih laie.
Daun pisang yang diguno’an yolah daun mudo. Yang baru habih kombang tu. Kek kampong bulih lah pilih. Oghang sinia pakai daun campor2 tuo dan mudo. Daun tuo tu sonang yo nak kona’eh. Bilo kito bolah lomang tu, tokolebak yo buluh tu, toghuyh tolanjang isi lomang tu. Daun’eh dah tak molokek kek isi lomang. Kadang2 tu bilo kito tonggeng’an buloh lomang tu, mongolonso koluar lomang tu. Tolanjang tak bodaun. Tak payak bolah laie doh. Kahkakaka.
Lomang kito ‘boghontak’ (hontak). Isi’eh padat dan jaghang tak masak. Kek topi jalan tu lomang’eh longgar. Tokey tu takut kok dihontak kang isi lomang’ah jadi sikit. Dah kigho sopaghuh ghogo plak. Tu sumolah tu, yg buek lomang skaghang ni ilang originality’eh.
Ado kawan2 coghito ado oghang jual lomang tu dighobuyh eh dulu dalam tin minyak tanah. Dah kombang dan masak lomang tu baghu dibakar’eh. Nak nampak kulit’eh hangguyh sikit. Nak kona sonang yo tu. Bilo kita bolah lomang, cubo tengok masak’eh. Kok samo yo daghi ujung sampai ko pangka masak’eh tu, lomang ghobuyhlah tu. Lomang bakar ni ni bobozo sikit. Kadang2 tu lomak santan tu bokumpol kek eteh.
Beso’eh kek pasar pagi/ pasar tani, kok jumpo oghang jual lomang tu cantik yo lomang’eh. Tulah deh. Lopeh tu pulak buluh’eh tak jumpo. Dio jual siap dah potong2 yo dan dijual bosamo dongan ghondang daging.
Kok kito poie open house aghi ghayo, yang bosa bosa sikit buek’eh. Macam parti2 politik atau wakil rakyat buek jamuan ko, lomang’eh laie pulak. Pulut yang dah dighondam ngan santan tu dikukuyh atau di ditanak yo. Lopeh tu digolek’eh pulut yang dah masak tu cagho momanjang (macam lomang) dalam plastik. Bilo dah ghupo lomang, di tokong2’eh pulut tu jadilah deh macam lomang. Masok dalam nighu (nyiru). Lalu oghang ghamai boghobot2….
Sekaghang ni laie canggih. Dah ado oven untuk masak lomang. Sonang. Set yo temperature dan maso’eh. Kito buleh tidor. Jago2 yo, lomang dah masak. Ghogo sobatang lomang di Lembah Klang RM10.00 ke RM15.00 mengikut saiz.
Apo macam pun lomang yang sodap, yolah lomang yang omak kito masak. Ese lamo dah tak ngaso…. Makan yolah lomang yang jual topi jalan tu… Laie pun doctor dah laghang ese makan pulut banyak2. Lomah kopalo lutut keteh dio’eh. Tompi ese tak cayo doh.
