AGHI GHAYO DATANG LAIE -3

Sample2 kueh dah mulo datang.  Kawan2 unjuk’an kek kito contoh kueh ghayo yang dio ado. Tompah dulu. Dah nak ghayo sok siaplah. Siap duit sokali. Macam2 namo kueh’eh. Yang ese paham bona yolah kueh Tat.  Dio sughuh’eh makan dulu. Tak boli tak apo. Test yo. Kok dah test kang tak boli sobosalah pulak ghaso’eh. Last sokali, boli lah sikit.

Dulu dulu bilo datang ghayo ni toghok badan. Ese ingat laie macamano omak ese nyiap’an kueh ghayo satu posatu. Laie duo minggu laie nak ghayo tu mulolah dio buek. Ese maso tu ambik poluang tak poso. Konon’eh ponek dan tokak haghuyh.  Antagho kueh2 yang beso omak ese buek kuih goyang, kueh ghojit sighat, bahulu dan kok ubi kayu banyak omak ese suko buek kerepet ubi bosigho gulo.

Kueh yang solalu ese kono nolong buek'eh yolah kueh bahulu dan kueh goyang. Longgoh tangan buek’eh tompi pueh hati. Acuan kueh goyang omak ese dulu osah lamo’eh. Soingat ingat ese yo maghin, acuan tu dah ado. Ado sokali maghin tu tangkai’eh patah. Ese ingat omak ese buang yo bondo tu, ghupo’eh dibowak’eh poie Kopilah repair bondo tu kek kodai ‘ayan’. Padahal bondo tu mughah yo sikit. Tompi sayang bona deh kek acuan tombago tu. Duo aghi sobolum guno tu,dah dighondam’eh dongan air asam jawo.

Ponah sokali dulu bilo akak ese dah bokojo, diboli’eh lah acuan yang baghu. Tak ondak omak ese doh. Tak cantik jadi'eh, keteh dio’eh. Bosi’eh toba. Simpan yolah sampai ghoput.

Kueh bahulu ese memang tak tolong maso masak tu doh. Paneh. Asap sabut tu buek sampai boghair mato dan ghaso bogho muko kito. Tulah omak namo’eh. Padohal dio tak banyak mano makan pun. Kito yang molantak banyak tu. Kuih bahulu yang paling ese tak suko (oghang lain lobih kughang yo) yolah gambar (acuan) ikan. Honggeh nak ngabih’an eh. Gambar manggih yo yang jadi ghobutan.

Maso nak buek kueh bahulu, pukol onam pagi dah kono kojot’an daghi tido. Tolong omak puko tolor dalam pasu, pakai pengodak spring. Onjot lah bondo tu tak ghonti2. Naik longoh longan samo bahu ese. Bilo ese polahan yo, dah kono togor. Takut tolor tu tak kombang. Sokaghang ni sonang amek2. Masok yo dalam mixer tu, tokan speed’eh nombor satu atau duo. Jangan tokan tigo atau highest speed memang laju, tompi kok melepet lepet kek dinding ghumah kang. Baghu golo.

Itu mano yang ghajin nak buek lah. Kok maleh tunjuk2 yo. Awas jangan torboli bahulu yg segera tu. Tu tak sodap bilo simpan lamo2 doh, yang sodap'eh makan maso angek2 tu yo..

Sokian. Jangan tak, yo hah..NSR..