AGHI GHAYO DATANG LAIE -5

Aghi ni dah mulo poso, mulolah konangan kito mongimbau2 tontang kueh2 maso borbuko poso kek kg kito dulu. Antagho yang ese gomar yolah kueh kolopong. Ado pombaco kito daghi luar NS mungkin tak tau kalau sobut namo kueh kolopong ni doh. Tompi bilo tunjuk ghupo’eh memang tau.  Ado oghang panggey namo’eh onde2, oghang sinia nyobut’eh buah molako. Oghang Perak kato, kueh mulong  . Ese tanyo oghang pantai timor plak, kato’eh ‘kueh kacik cerek’.  Osah boto lah.  Agak’an bilo kono kacip ngan gigi tu gulo’eh koluar, momancut.  Tu dipanggey’eh ‘kacik cerek’ tu. Tak kesahlah tu. Yang ponting sokali bondo’eh samo.

Namo kolopong ni ese ghaso asal’eh daghi buah kolopong. Dulu2 kek tobing sungai banyak jumpa pokok’eh. Buah’eh ado yo samo sikit ghupo’eh. Ado oghang tompek lain manggey’eh pokok aro, tompi kito pulak ngato’an pokok aro tu yolah pokok yang aka’eh yg banyak borjuntai tu. Lantak kek dio lah.

Maso kocik maghin tu, oghang kato ‘kokoghok’ banyak maso buah kolopong masak. Puehlah kito monokup kudih kito daghi diughung’eh kek kokoghok. Kudih pulak banyak. Apo tak banyak’eh kudih, bacang mudo dihepong’eh cam tu yo. Kono gotah’eh, bokudihlah kito. Jadi untuk mengelak’an daghi kokoghok banyak poielah bawah ghumah. Caghi dan bakar tompek kokonghok boghangoh.

Cagho buek kueh kolopong ni nampak’eh sonang mek amek.  Topong pulot diuli2. Ambik socopot2 topong yg dah diuli tadi, bonam’an gulo dalam’eh. Digintey kek tapak tangan, bulat la deh.  Joghang air lam piok sampai ngologak. Lopeh tu locut’an sokojap lam piok topong tadi.  Angket,  lotak’an lam dulang yg dah ado nio kukor dalam’eh. Guling2’an kojap dah siap.

Kok kito boli kueh kolopong ni diluar NS, ghaso’eh tak sodap doh. (ikut tokak kitolah) Buek camano punlah. Tak sodap doh. Camano nak sodap, gulo eh cair dalam tu. Tu yg manggey kueh ‘kacik cerek’. Toboh kito tak cair gulo’eh. Kogheh dan bodoghup gulo’eh bilo kito gigit tu. Sobab’eh kito pakai gulo anau. Dio oghang pakai gulo meghah atau gulo melako.

Tompi sokaghang ni pun agak ese dah mulo yo cair dah. Sobab’eh gulo anau susah nak dapek dah. Kek Pasar Pilah ado yo monjual gulo anau ni. Duo macam laie.  Keteh ponjual tu, satu yg ori dan satu laie yg campor mughah sikit ghogo’eh. Ese ponah boli duo tughih yg ori tu. Dah sampai ghumah ese cubo try test uji, tak do doh campor yo ghupo’eh. Kok ese boli yg campor, keteh dio tu camano lah agak’eh. 

Gulo anau kek Sg Jolutong, Jena Jonun kek Joghojak atau kek kg Sg Talan atau Toghontang jaoh lobih sodap dan cukup ori. Kek Bayai tak jumpo laie. Taiko2 gulo anau ni dah moningga sumo’eh.

Kueh kolopong jangan dimakan maso tongah angek2 tu. Molocot lidah. Ghaso ngan jaghi memang dah sojuk, tompi gulo’eh kek dalam tu bolun sojuk laie. Bowak sosoba sikit. Montalah laie kok makan dalam bulan poso.

Lain2 kueh yang agak samo suku’eh ngan kueh kolopong ni yolah kueh kuci. Kueh kuci uboh inti nio dalam’eh, dibungkuyh ngan daun pisang dan dikukuyh. Kueh sopang pulak samo yo macam kueh kuci. Bezo’eh kueh sopang tak dibungkuyh. Masok’an dalam loyang, cughah sikit santan nio dan kukuyh.

Laie satu kueh yg hampir samo bahan’eh ngan kueh kolopong yolah kueh Taik Mandi.  Ese kono maghah’eh kek oghang tuo ese maghin tu, bilo ese cakap kueh taik mandi ngan isteri ese maso baghu nikah dulu. Keteh oghang tuo ese kueh Puteri Mandi. Mandai2 yo cakap kueh taik mandi. Tompi daghi ese kocik maghin tu ese memang dongar sumo oghang cakap kueh taik mandi. Dah nikah pulak tak buleh nyobut taik mandi. Agak’eh dah nikah kono tukar namo pulak. Pongotor bunyi’eh… tompi sodap nekmoyang.. 1 ramadhan 1432H