KENANGAN YG BOLEH DIKONGSI - 2

Oghang tuo tu tersonyom dan tersongeh songeh keaghah kami.

“Sapo lak oghang tuo ni…” pikir ese dalam ati.

“ Itu Haji Saghit tu. Atok pangge eh.”  Abah ese bagitau. Seolah olah dio tau tando tanyo dalam ati ese.

“Salam kang cium tangan dio yo..” Tambah pulak dek omak ese,  macam nada bobisik yo. Tompi ese dongar dan paham.

Kami bertomu. Masing masing ahli kami bersalaman dengan beliau.  Ese last sekali salam.

Dio tonung muko ese. Dio sonyum. Ese pun konolah sonyum.

“..ini Nasiruddin kan.” Tanyo Hj Saghit pada ese. Berdoghau darah ese di buek eh. Dalam ati ese toghus terlinteh, bahawo oghang tuo ni bukan sebaghangan doh. Mano pulak dio tau namo ese. Sobut namo yang dalam sughat beghanak lak tu.

“Iyo…” keteh ese.  Sambil menganguk kopalo. Seghontak dio memonggang kepalo ese yang tonggah bergoyang tu.

“Moh!, singgah dulu, lamo dah tak jumpo ni. Uwan kau ado kek eteh ghumah tu hah.” Ajak eh. Ese pandang abah ese.

“Moh laaah.. Kang maghah uwan kau, tu kang.” dosak Hj Saghit. Alasan..

Abah ese cakap berbisik kek Hj Saghit. Terdongar yo sesikit. Nampak eh macam abah ese cubo menolak pelawaan tu.  Antagho alasan eh ialah, balik jauh, masuk dalam utan, bowak lak budak budak, tambahlak laie takut aghi hujan.

Somuo alasan tu ese setuju. Makan kek akal. Bab aghi hujan tu yang mengocutkan bona poghut ese.  Ular, lipan, jongking, kolingkiak, somut gajah akan banyak keluar kek jalan nanti. Mano tau, kok nak goghuh. Tompi keteh abah ese dulu, kok bolun nak mati, jatuh pokok nio kopalo dulu pun tak mau deh mati doh.

Soghang oghang tuo pempuan meninjau keluar, di lompar ghumah limeh tu.

“Oii  weeh, singahlah duluuuu.” joghit oghang tuo tu.

“Tak kona laie ko, kek den ni..?” tambah eh laie.

Tak ado jawapan dari soalan tu. Kok nak jawap pun, tak terjawab doh. Soalan penamat. Takut datang pulak soalan lain. Ngato’an ‘dah sombong ko? dah kayo ko? Oghang tuo ese tak nak ambik risiko. Pelahan ese ngikut abah ese masuk ko kawasan ghumah godang tu, naik ke eteh.

Kami bersalaman pulak ngan oghang tuo tu.  Kojap tu dio masuk kedalam, diikuti kek akak ese tughus ke dapor.  Akak ese macam dah beso yo ese tengok’an. Tak lamo akak ese keluar menating air minam dan cawan dalam pantar ayan. Ado cengkodok pisang.  

Teh’o dituang. Disoghong’an kek kami.  Masing masing dapek satu. Lopeh tu uwan tadi keluar bowak pulak pisang dalam pinggan.  Oghang tua ese rancak bebughak. Ceghito eh macam macam. Ese dongar. Ado yang paham ado yang tidak. Lebih kughang lopeh 20 minit abah ese mintak diri. Kami dibokalkan sesikek pisang.

Cadang nak singgah lagi satu ghumah. Memang abah ese dah niat daghi awal nak singgah keghumah ni nanti.

“Sapo tu mak.?” Tanyo ese sebaik sajo keluar pagar ghumah bosa yang dopan eh ado kobun  gotah tuo.

(semasa 1975 pokok gotah tuo tu dah tak ado laie. . dah ditanam ngan poko buah markisa. 1^st time tengok buah markisa)  

“ Uwan Cacik namo eh. Oghang kito tu.” jawap omak ese.  Ese ontok yo. Nak tanyo apo laie. Pokok pangka eh pun tak tau. Ontok lobih baik.

“Namo kau tu atok Saghit tu lah yang uboh tu.” Tambah eh lagi.

******************************

Kami menyusuri satu jalan dicolah colah pokok gotah tuo disobolah kanan jalan.

“Nak poie mano pulak ni mak?” tanyo ese

“Poie singgah ghumah Atok Peet kau. Kito dah lalu ni hah, nyongok lah kojap”

Atok Peet iolah abang kek arwah uwan ese bolah omak. Maksud eh pak sedaro omak ese. Ese ponah jumpo dio, maso dio ziarah kek kampong. Tompi dio tak beghapo ghapat dengan family ese.  Abah ese ni punyo pesen lain sikit. Dio tak ondak oghang kato, dio ngajar anak anak kughang ajar. Apo laie sebolah omak ese. Mako tu dibowak eh kami ziarah kek situ.

Terkojut oghang tuo tu, bilo kami sampai. Dio sodang duduk kek pangkin dopan ghumah eh tu, sambe ngasah pisau gotah. Nampak eh macam lopeh mandi yo. Rambut eh basah laie. Beso lah tu, oghang jantan mandi gambut basah.  Lopeh motong. Kan ado apo apo doh.

Ditinggal’an kojo eh kek situ. Pisau gotah tadi dimasok’an dalam tin Dumex tompek colop air gasah pisau. Kaghang nyambung balik lah agak eh. Dia basoh kaki naik ke ghumah. Lalu menyomput kito naik. Uwan dari dalam ghumah keluar menebeng kek lompar.

“Oii..oghang Bayai ghupo eh ah. Naik lah”

Tibo tibo datang seoghang pemudo. Mudo tak mudo lah. Lingkungan umor 30an. Agak eh. Dia datang dan bersalam ngan abah ese.

“Aaaah aaah aha ahhha aaaaa. Aaaa. Aaa.” keteh dio. Abah ese tak paham lalu naik ke ghumah. Ese pun tak paham lalu ngikut abah ese naik ke ghumah. Tak do respon. Dio ngadap pulah kek akak dan omak ese.

“apo bondo eh..” tanyo akak ese macam nada cakap ngan oghang pokak.

“Tah apo name eh Kota ni cakap tah” nyampuk pulak omak ese.

Uwan di lompar tu paham. Yolah oghang tingga sebumbong. Tontulah dio paham.

“Dio ngajak kito makan samo samo.”

“Ah aah hahh aaaaa, aaa “ sambung Kota balik. Pueh hati eh sobab kito dah paham apo yang nak dikoba’an eh tadi. Mako tu dio cakap yang lain pulak. Aduyh..hai..apo laie nak dicakap eh ni.

“Dio kato, makan gulai jangek. Dio yang tolong layat jangek tu tadi.“ alih bahaso dek uwan tu.  Nampak gigi eh rongak bolah bawah.  Kota bercakap lagi sambil mengangguk lalu mengisyaratkan ibu jari eh togak ko eteh.

Uwan paham. Kali ni omak dan akak ese pun paham. Dan ese pun paham cakap dio kali ni.

“Ha ahh sodap. Yo laaah sodaaaap. Tau den tu.” omak  ese setuju dan paham apo cakap Kota.

Kami dihidangkan nasi gulai lomak jangek. Kami makan.

Sodap yo jangek ni ghupo eh. Kota, namo sebonar eh iolah Mokhtar.  Pangkat duo pupu kek ese. Omak eh dah meninggal dunia. Dio bisu dan pokak. Tapi keteh omak ese dio baik ati dan ghajin tompi kuek cembughu.

Lopeh makan kami toghuskan perjalanan. Sampai dihujung jalan simpang nak masuk jalan hutan, kami jumpa sebuah ghumah. Disebolah kiri. Legheng bukit. Soghang lelaki tua berumor sepaghuh abad sodang ngosok basika di muko tango. Abah ese toghus yo masok. Kami ngikut. Oghang tu menyambut kami dan memanggil oghang ghumah eh di seghambi…

SIKIT LAIE HAHHH……….SAMBUNG JUGAK LAH LAIN KALI. MINGGU DOPAN LAH PULAK.

SAMO SAMO KITO TUNGGU…ADAKAH KISAH ANAK DAGHO SUNTI KEK JEGHOJAK DAH BOSA MAIN PONDOK2  YO LAIE ..SAPO DEH..EH..

KOK ADO TUNGGU LAIN KALI…