BAYAR! Bukan Bai Ya bukan Bayai

Dah hampir sobulan dah, sojak lopeh ghayo aji maghin tu. Tak ado yg ngantar posting banghu. Bukan posting baghu yo doh, komen pun tak ado. Ghaso nak masok yo, tompi tak ado bondo nak tulih. Jadi ese pun ontok yolah nyambey sosokali ninjau kek blog ni. Walaupun tak ado yang ngantar apo apo boghito atau coghito, tompi polawat ado yo sotiap kali ese nyogok. Agak'an ese masing ninjau kok ado posting baghu. Namun apo nak buek, bondo eh tak ado. Lamo ese pun maleh nyogok. 


Ontah camano geeh aghi ni ati ese toragaklak nak nyogok. Manolah tau kok ado apo apo yang botambah. Manolah tau kok ado cito Dt AJA daghi Sukan SEA ko. Paling kughang pun cito posilat Indonesia yang bukak langkah yang solalu disobut oghang tuo tuo dulu. Dalam kito bolajar silat memang ado langkah tu, tompi tak ponahlak ese nongar ado tok gughu yang ngajar langkah tu doh. Itulah kok dapek Dt AJA cito sikit camano kek Indonesia ado lak tok gughu yang ngajar langkah RAHSIO tu. Dalam ilmu kependekaran langkah tu kobanyakan persilatan mengharamkan langkah tu. Sobab bondo tu haram, tulah pasal eh tak diajar'eh kek mughid mughid dio. Yang ese dapek tau langkah tu Jokiden mahir sikit. Mungkin ado yang lain lain tahulak langkah tu..
Cocito sapo tau langkah...


Lopeh tu ese tengok kek jumlah polawat. 'Today 1-Selangor'. Ese lah tu. Ontah boghapo aghi dah cam tu gak'an. Ghaso ese somalam misti kosong tu. Lam ati ese 'cam ni tak cocahlah 16000 ni.


Dua minggu lopeh ese poie main Laser Games kek I-City. Main ngan budak budak mudo. Honggeh ese main eh. Tompi kan tu yang ese nak cito doh. Ese nak cito maso ese masok moncaghi tompek main Laser dalam I-City tu. Boghonti kek jalan nak masok kek tompek parking tu. Ese tanyo kek budak Bangla yang jadi security kek situ tu.


"Boss, mana itu tempat main laser punya?"


Dio tojongok jongok pandang koliling. Moncaghi ko atau bopikir. Tak tahulah ese tu doh.


"Mana tempat..?" ese dosak sikit laie dio. Agak'an dio sosak tak dapek nak nyawap.


"Abangggg.. saya sini baru punya orangggg.." ponyolosaian dio.


Tibo tibo kawan ese kek sobolah bosogho kek budak bangla tu.


"Kita pun sini baru punya orangggg..."


"Ya kita sikarang baru sampai. Lagi baru sama awak" tokok ese.


Dio tosongeh. Ese cakap kek kawan ese. "Kalau lah dua dua pihak aorang baru, susahlah nak cakap. Boleh pulak jumpo yang sama sama baru ni" Sambey ese tosonyum. Kawan ese togolak. Ese tompang. Kito boduo togolah godang. Kahkahkahakha....


Maso balik tu kito jumpo laie dongan dio. Kito boghonti balik dokek dio sobab tak jumpo mesin auto pay. Cadang'an nak tanya tompek eh.Kawan ese pulak yang tanyo.Sambey monunjok'an tiket parking kek bangla tu.


"Mana bayar.."


Budak bangla tu sokali laie panik dan tolopong "Ahhh! Bai Ya?"


"Bayar!,bayar! Ini tiket mana mau bayar? Bukan kau punya Bai Ya" toghang kawan ese.


"Kau punya Bai Ya apa bikin, sana bangladesh duduk juga ada.." sampok ese sambey togolak.Kawan ese pun togolak. Dan budak bangla tu pun tompang togolak. Kami lueh'an golak godang sogodang godang..Kahkahkahkah..kikihkih..NSR..