Jaghang oghang dulu2 kek kg kito nyobut bulan Ramadhan ni. Masing2 nyobut bulan ‘poso’ yo. Bilo ghayo pun tak sobut Aidil-Fitri doh. Ghayo Poso disobut’eh. Bilo nak mulo poso tu, tompek lain biaso yo. Tompek kito bosa tu. Kito sobut ‘Aghi Mogang’. Bilo nak sampai aghi mogang tu, macam nak ghayo yo ghaso’eh. Ado yo yg nyobut’eh ‘aghi mantai’.
Aghi ‘Mantai dan aghi ‘Mogang’ ado bezo’eh sikit. Mogang tu makno’eh puaso. Ghoti’eh kito nak mulo pogang tuntutan untuk berposo tu. Poganglah kokoh-kokoh ibadat poso tu. Jangan poie makan dalam blukar pulak. ‘Mantai’ pulak makno’eh kito nyomoleh lombu atau kobau atau apo sajo yang buleh dibuek lauk.
Dulu dulu kito oghang2 kampong ni bokungsi momboli sekor lombu atau kobau. Ado yo oghang nyobut’eh ‘bortak’iyan’ (share/kongsi). Kaedah’eh kojosamo. Lombo atau kobau tu diboli menguno’an duit syer tadi dan disomolih pado aghi ‘mantai’. Daging’eh tu dibagi samo banyak, mongikut bilangan peserto. Kok 20 oghang ahli, dibueklah 20 lunggok. Sumo dibagi samo. Daging’eh ditimbang samo ghato. Bahagian yang lain pun cam tu yo. Sampai’an hati, limpo atau gabu (paru2) lombu atau kobau tu pun dilapah dan dibagi samo banyak. Dah siap panggeylah sumo oghang. Sughuhlah pilih mano yang konan kek dio.
Ado yo oghang tak laghat laie nak kojo kuek atau jando ko, oghang tuo ko, masok syer. Kaedah bagi’eh samo yo cam tadi. Tompi oghang yang buek kojo diboghi lah lobih sikit bahagian daging tu. Duo kati, tigo kati ko, bogantong pado bilangan ahli. Biaso’eh sumo oghang pueh hati dapek daging banyak, bobezo kalau kito boli sonighi kek oghang lain yang ‘mantai’. Lamo2 tradisi tu mulo ilang. Skaghang ni sapo tak kuek nak ngojo’an nyomoleh lombu, boli yo lah kek mano2 oghang ado jual daging. Siap’an yo duit eh.
Jadi tradisi sosotongah oghang moli tulang untuk dibuek ‘ghobusan’. Budak2 sokaghang ni dah tak ghoti laie nyobut ngubusan tu doh. Yg dio tahu ‘sup tulang’ yo.
Aghi tu lah oghang tuo kito buek lomang. Buek ngondang koghing. Nak cocah ngan lomang. Sonang maso makan sahur nanti, tak payah nak masak pagi2 buto tu doh. Tompi tahan’eh sominggu yo lobeh kughang. Lopeh tu solosailah. Ngango lah balik smulo...NSR..
![]()
Salam dan syabas NSR selalu menulis dan ada banyak ide.Saya bagi kredit pd NSR diharap teruskanlah lg untuk di kongsi bersama.AJA
ReplyDeleteSajo yo tu Tok. Kok buleh biar ghamai polawat blog kito ni. Kok ese tak buek posting, polawat akan sughut lah jawab'eh.Ese ado buek satu blog daghi 2008 laie. Tompi polawat'eh tak soghamai ini doh. Limo ghibu pun tak cocah, walau pun dah 3 tahun.
ReplyDeleteEse ingat nak tel radio Nogoghi FM lah, mintak dio war2kan blog kito ni. Biar mondoghu oghang datang..NSR..
Sobut pasal mogang dan mantai ni ghaso tak soba pulak dah nak ghayo aaa... macam budak2 lak ese ni.. poso bolun laie dah nak ghayo.. kih..kih..kih..
ReplyDeleteJokiden
As-Salam,
ReplyDeleteMinta maaf lamo na tak timbul lam blog ni, esei ado tak kemano-mano, hanya kesibukan maso yo...hari-hari memang tengok blog tapi tak sompek nak menulih-nulih, ideo pun kughang....walau apa pun tkasih NSR n MD sentiaso menghidupkan blog kito ni....
Nanti sei menulih lg......TUNGGU
SSAK
Sharep sibuk nak Rayo..baju baru dah boli lum.Maso budak2 dulu bolum poso dah sibuk poi Kolopilah naik bas merah(bas union) boli baju/seluar dan kasut rayo.Hari2 tengok baju/ seluar dan kasut sampai kono togur kek omak sei.Bukan apo takut seluar baju kopam sebolum dapek dipakai.Tak taulah sei yo ko mengalami atau kawan2 lain pun samo.Cubolah ceto ckit...Lagi satu seminggu sebolom ke Kolopilah omak dah boghi tau nak poi naik bas merah.Dio ingatkan sei jangan nakal2 sok kok tak omak bawak...kadang2 kelakuan budak biasolah tak sengajo buek salah semuo adik beradik akan ingatkan...Kau tak nak poi Koilopilah ko kata mereka..Maso tu yo sei jadi baik..biasolah bilo lupo bueklah balik..Semua pengalaman tu tak berlaku pada anak2 alhamdulilah...kau semua anak2 yang baik kesayangan emak ayah,semuga akan berterusan hingga selamanya..amin
ReplyDeleteAsSalam,
ReplyDeleteMengenangkan zaman kanak2, sei teringat semasa zaman sei dulu2, sei hanya merasai keseronokan tu semasa sei masih mempunyai ibu, setelah ibu sei meninggalkan buat selama2nya sei tak dapek ghaso apo yg seperti Jokiden, Dato' J rasokan, tak ponah fikir nak itu ini lg, hanya dlm kepalo fikir mcm mana nak uruskan bapa dan adik beradik jo. Pikir mcm mano nak nyambut ghayo. Hari rayo samo yo, tapi poso tu teraso lah sikit, sbb bulan ramadhan ni semuo org poso. Sebulan poso tu memang teringat apa2 aje yg buleh mengingatkan kpd emak yg dah poie, tentang masakan dio di bulan poso, kueh2 spt kueh buah sopang, tahu sumbat kuah kacang nyo, air batu, gulai2 yg dibuatnya, tambah2 laie kuih kolopong. Bilo ghayo mcm tak ghayo raso ee, apo yang dighasokan nak copek2 poie kubur ziarah kubur emak di pg ghayo.
Bab shopping mcm skang, tak fikir2 pun, apo yang ado, sokughang2 ee tukar solai sorang dah cukup.
Bilo potang ghayo, semua persiapan ghayo dibuek bersamo2 adik beradik, solosai sumo, sambil menunggu azan berbuko, sei adik beradik duduk kek tanggo, maso tu tanggo umah sei berbatu telo melengkok2 mcm great wall of china. Sei pandang muko akak sei, bolinang air mato dio, bilo dah sorang meleleh air mato semuo pun ikut meleleh air mato, akak sei usap ghabut sei ngan adik sei. Tak tokato apo2, mcm masing paham apo yang difikirkan. ANEH!!!Abang sei mandang tochongang2, bilo nampak bayang bapak sei datang, kami puro2 ceria....begitulah seterusnya...sampai harirayo esok paginyo.....
Maso Hari rayo ado coghito laie, bagaimano sei menghadapinyo pulak....lain maso sei coghito...
TUNGGU......
SSAK
Salam...se sobona e takut menghadapi perasaan ni ketika nak menyambut ghayo ni...Inilah ghayo pertama tanpa anakanda tercinta Mohd Fitri tiada d sisi. Dia pergi menghadap Ilahi Tahun lepas pd 4 Syawal...begitu juga kenangan bersama arwak Omak...inilah InsyaAllah persediaan pertamamenyambut raya selepas pemergiannya...dia pergi 2009 kira2 2 minggu lepas raya..pd 2010 pulak sy tak ingat pun nak menyambut raya kerana menghadap anak yg nazak..jd raya 2011 ni lah baru mula nak tengok2 org mantai semulo kek kg..entahlah..mungkin perasaan sy mcm perasaan Shara lah nnti.
ReplyDeletesei pulak dah yatim piatu kalau dato Jalil nak boghi fitrah kek sei..elok bona lah tu, layak dah.
ReplyDeleteMmg sei bayar zakat n fitrah setiap tahun..tp kepada mereka yang berhak saja..kalau kawan2 raso perlu bolehlah jugak tapi kok malu.Sei malu n kawan2 pun malu timo sedokah.Bayangkanblah TLIS timo dari sei..tergamang orang kok ado yang meninggal dek lomah jantung..
ReplyDeleteSei plak baghu balik boli baju anak kek Nilai..macam Jokiden jugo dh macam tradisi lak boli baju ghayo kek Nilai 3, podah he kek Bahau monimbun oghang jua baju, cantik yo, banyak pilihan..baju kughung, kobaya, kughung pahang, kughung moden..kughung 'malaysia'..macam2 pilih yo..tompi anak dagho se ni Nilai yo yang dipilih ee..Ayoo..ikut an yolah...omak tak do baju ghayo tak po doh asal anak pakai baju baghu...kasut ghayo camtu yo..anak dagho se baghu umo 14thn dh nk pakai kasut tinggi tumit..(ngalahan omak ee)..ayo botolah budak ni.. nampak ee se pakai slipar yolah bialah anak pakai kasut tinggi keh..keh..keh..
ReplyDeleteKengkawan...mogang ni tak do ko yang nk balik ee mantai kek kampong..ese buek lomang nk ghayo sok.. kolo 2kilo bogheh pulut ee 6batang dapek lomang ee.. nio ee nio tuo (yang bolom masak ..kulit ee masih ado warno ijau), baghu lomak lomang ee, dh ngologak tu ontak2an bia padat, api ee lak jangan bosa bona..kang kok anguih, dh nk masak tu sugahi an api ee baghu sodap lomang ee..jumpo lai..adi kojo lak haa...MD
Kalau 2 kilo dapek onam batang, makno ea cekiding bona lomang tu Kakcik...?
ReplyDeleteEse baghu yo cino tailor sms aa ngatoan baju ghayo dah siap, sughuh amik copek, ooomang upah ea dokek nak soghibu...paghah se..
Tahun ni ese buek 3 pasang baju molayu, solalu ea taun2 lain tu duo pasang yo, taun ni sobab nak ado pojumpaan aghi ghayo SMBK, mako ese tompah 3 pasang, Kain boli kek Tangkak, bukan Nilai Tigo doh..amik kau..
Jokiden
Iyolah kalau nak buek banyak tambahlah lai kilo ee.. tompi ese tk buek banyak do sbb anak tk goma lomang..yang goma ese ngan hubby yo, tu pun kalau banyak bona makan loyo lak..lai pun dh potang potang ni jagolah sikit..high cholesterol tuu..
ReplyDeleteEse boli baju ghayo kek Bahau yo.. kok payah bona sok pakai yo baju ghayo taun lopeh..dapek yo ghayo...MD
Apo pun kalau terlobih mmg meloyokan..Orang perempuan kalau kono morning sickness pun loyo juo he hee. AJA
ReplyDelete