AGHI GHAYO DATANG LAIE -4

Ramadhan tu makno’eh ‘paneh’. Paneh yang monyogek. Bukan ponyogek yg menyogek tu doh. Itu Bee namo’eh. Cuaco paneh, badan kito paneh, tokak paneh. Walaupon aghi ujan lobek masih paneh. Hati pon kadang2 copek paneh, kok tak dibowak bosoba banyak2. Mudah bona nak bongih’eh. Bukan buleh usik sikit. Bulan lain buleh, bulan poso mintak mahap banyak2.

Camano nak ngughang’an paneh dalam bulan poso ni?. Solain bowak Istighfar banyak2 atau ambik wudu’ buleh yo bowak tido. Lopeh tido kang paneh yo laie, bowaklak poie mandi. Maso kek Kg Mungkal maghin tu sonang, toghojon yo dalam tang-air kek baghoh tu. Kek Bayai sungai jauh, tompi kito mandi pigi.  Solalu yo ese toghojon boghondam dalam pigi.  Lopeh tu kono timbo lah pigi tu. Tongah boghondam tu kang, kumor2lah air lam mulut. Minta2 totolan air pigi tu. Kalau totolan tak batal poso doh. Tak songajo namo’eh. Pandailah nak hidup. Dah bongkar daghi pigi tu kang, jangan lupo bibir tu didodat sampai koghing. Kok tak pocah tomolang.

Dulu2 poti sojuk tak ado. Kok ado pulak tak yo buleh pakai doh, letrik bolon masok laie. Bilo nak buko poso tu poie lah kokodai boli sebuku air batu.  Sobuku kocik 10sen, yg bosa 20sen.  Kok 20sen tu bulehlah sampai lopeh tarawih kaghang. Yg 10sen tu solosai maso buko tu yo. Biaso’eh air batu diboli kek kodai runcit kg ese. Kodai tu pulak ambik stok’eh kek Tukikir atau Simpang Potang.

Tunggulah kek kodai tu dalam pukol 6 lobih, bilo tokey kodai balik bawak air batu. Kadang kadang air batu dah habih.  Yang buleh dapek cumo oghang yang dah tompah yo. Tokey kodai tak boli lobih bona doh, sobab’eh kok tak abih susah nak nyimpan. 

Semua air batu tu akan disimpan dalam kotak kayu.  Untuk menahan air batu tu daghi copek cair disolimut’an lah air batu tu dongan habuk papan.  Masalah’eh bilo kito boli tokey tu tak boghi habuk papan tu doh. Dibungkuyh’eh dongan koghoteh sok’koba yo. Bololah lah kito baik ghumah, ngantar air batu tu. Kok tak kang kocot deh.

Tulah bilo mulo nak mogang tu, masing2 bawak kaghong poie ko Sawmill kek Simpang Potang nun  ambik habuk papan. Sonang nyimpan air batu kek ghumah. Sokaghang ni Sawmill pon dah tak ado kek situ laie. Kok ado pon tak ngaso nak ambil free doh. Sumo diproses’eh jadi papan lapih. Dulu tu dibakar’eh yo.

Cubolah bayang’an bilo maso bobuko. Macam burong mandi. Air sokole soghang yo, habih. Lopeh tu honggeh. Condawo pun toghaso air tu. Kok air sirap, ghaso sirap condawo’eh. Jus oren F&N tu bulan poso laku boto kek kodai. Bulan lain tak ando nak moli doh. Bulan poso lah kok nak ngaso.

Ado maso ghajin tu ese suka buek air ‘Jando Pulang’. Sobonar’eh air nio mudo yo. Tompi campur ngan isi eh sokali. Kughang manih tambah gulo pasir atau gulo anau. Tak gogham nengok’eh uboh sirap bagi meghah. Nak lobih monoghokam laie masok’an solasih. Bologhup2 bunyi’eh bilo kito gigit ngan isi nio tu. Tompi solegho kito mano mau pueh. Maso tulah air batu tadi main peranan. Nak pocah2’an ko atau nak masok sobuku lam air tu. Topulang.

Sampai sokaghang ni ese masih tak paham laie doh. Kek mano toboh’eh buleh dapek namo ‘jando pulang’ pulak?. Bodasarkan panton lamo ni..

Kok nak tau podeh’eh lado

Dipatah patah digiling giling

Kok nak tau banyak’eh jando

Kolopilah simpang Sonaling.

Agak’an oghang Sonaling yang boghi namo tu..kan? kan2?..ghaso ese iyo.. kihkihkihkih Ontahlah.