KENANGAN YG BOLEH DIKONGSI - 1

Bang MCC menuntut sesuatu untuk ditulis dari semua.  Beliau tak tergamak untuk menganalisa, takut  tersinggung.. Kalau menulis tak kena analisa agaknya.. maka saya pun tulis lah.. cuba baca….NSR…

Satu subuh beberapo bulan selopeh  peristiwa 13 May 1969, ese  dikojutkan dari tidur dengan bunyi sogho  seseorang yang tidak dikonali. Ese ontok yo kek eteh tikar mengkuang, tompek tidor.  Beghensot pun tidak. Selimut kain buntil topong cap kunci terlungguk dihujung kaki. Nak tahu bonar, apo ceghito eh oghang bising bising tu. Maklumlah lopeh gaduh 13 May. Begaduh laie ko ge’eh melayu ngan cino.

Tak dapek nak ese lupokan doh. Ado satu hari tu, maso 13 May,  soghang budak pempuan dikampong ese dah buek perkaro tak semonggah.  Dio main dalam kopok padi eh, lalu terjumpo tetawak dalam kopok padi tu.  Dikotok’eh  lah tetawak tu kuek kuek. Dung! Dung! Dung! Bunyi’eh.

Apo laie, oghang kampong pun hebohlah. Yang betino caghi anak anak. Nak nyughok. Nan jantan pakat pakat poie bawak  senjato. Ado bawa paghang panjang, ado bawak senapang patah, ado yo yang mowak lombing. Tah mano di ambik dek’eh. 

Dalam pado tu ado lak soghang oghang kampong bawak ceghito, ‘cino kek Seghoting dan Simpang Peghotang dah megamuk’.  Masing masing oghang jantan dah berpakat nak tunggu kek jalan bosar. Mano tau kok buleh menghalang kemasukan musuh kedalam kampong. Takut pun ado, goli ati pun ado. Dongar ceghito eh cino yang sodang motong kek estate seghoting nun ah, belolah laghi  ghamai ghamai balik keghumah, bilo nampak oghang melayu keluar mawak senyato.

“gadoh laie koh ge’eh?” hati ese tertanyo tanyo. Kain sarong yang nyaghih telucut, ese taghik dan solit ‘an kek pinggang.

Lopeh tu ese terdongar, oghang yang datang tadi tu boghi salam dan kato eh nak poie ghumah oghang lain pulak. Ese lalu bangun dan menebeng muko ke omak dan abah. Pasang telinggo. Nak nyampuk kang kok kono plak sepelopok, pelompang tak botanyo.  Kok berdamar muko.

Abah ese bagi tahu, adik dio telah sampai hukum’eh (meninggal dunia la tu) kek simpang jelutong.  Ese diam yoh. Ese tak kona adik abah ese tu doh. Kok dio ponah ndukong ese maso ese baby dulu tak tahulah. Tompi yang osah eh, ese tak kona.

Abah ese siap siap nak ke Ulu Jompo.

 “ Tah sompek ko, tah tidak  lah ni. Kok ado joki dapek nengok jenazah tu kang” keteh abah ese ngoba’an kek omak ese. Omak ese diam yoh.

Ese nampak omak ese ngulorkan bokalan air minum dalam bocong.  Abah ese pun bertolak poie.

Biaso dio kok balik kg dio, kek mungkal  tu ikut jalan hutan yoh.  Ghamai oghang cakap. Tompi ese memang tahu, sobab’eh abah ese sendighi yang cakap. Kadang kadang adolah bondo bondo dari hutan  dio bowak balik, nunjuk’an kek ese. Ado antagho bondo yang ditunjuk’an kek ese tu, tak ado laie ese jumpo doh sampai sekaghang. Ese ingat sekali tu dio bowak balik ulek gonggot bulat. Bilo ese usik yo ulek gonggot tu pun betindak baleh, lalu bergulong jadi bulat macam guli sebosa penutup air mineral sekarang ni.

Ado yo yang ngato’an abah ese balik jompol naik belakang ghimau.  Yang lain pulak ngato’an dio copek sampai bebanding oghang yang naik kegheto ikut jalan Batu Kikir. Ese tak cayo doh..

“Ese  jumpo dio kek kodai maso nak ke Jelutong maghin tu. Bilo ese sampai kek sunun, ese jumpo dio balik. Ese naik kegheto tuuu  !!..”

Ese dah kompom’an dengan abah ese maghin tu maso dio kuek laie dan ese pun dah godang. Ese tanyo boto kek dio eh. Mano lah tau kok iyolak dio ado molo ghimau.  Dio kato, tak ado doh. Oghang yang penakut masuk  dalam hutan sengsoghang diri yo, yang cakap cam tu.

“Makan eh kek ghimau, baghu tau. Oghang molo lombu kobau, kito molo ghimau lak..” toghang abah ese.

“..memang dio naik kegheto. Tompi dio beghonti kek Tekikir lamo lamo, kono lak teh secawan duo… makan rojak..bebughak kuek.. memanglah dio lambek sampai.”

Tompi memang abah ese selalu ikut jalan hutan. Dari Ulu Bayai lanteh ke Joghojak lebih kughang semilan ke sepuluh batu. Campur dari ghumah ke Ulu Bayai adolah dalam 3 batu pulak. Sumo ‘eh  kughang lobih 13 batu. Kok tak silap ese, ese senighi ado 3 kali ikut jalan utan ke Jompol. Antagho eh poie ngambek lansat kek Majon di Joghojak, sebolah ghumah Uwan Sindon omak Isa Jobok.

Walau pun utan yang dilalui tu utan bosa, namun setiap kali kito lalu selalu berjumpo dengan oghang lain diperjalanan. Antagho yang ponah ese jumpo iolah Lobai Bakar (ongah)dan anak anak dio, Zamani dan Jalal.  Ese anggap dio anak beghanak tu memang hebat dalam soal hutan ni. Binatang bughuan dihutan  atau pun akar kayu (ubek ubek’an) jangan kelentong lah.  (Sekaghang ni,  ese selalu yo jumpo Zamani tompi di Subang Airport pulak)

* *  * * * * * * * * * * * * * * * * * * * * * * * *

Duo aghi lopeh tu, datang lah posan dari abah ese, melalui sedagho magho yang balik dari Jompol. Posan ngaba’an sughuh omak ese datang ke sinun , bowak anak anak sekali, sapo yang nak ngikut.

Ese dan kakak ese soghang  kato nak ngikut. Booking awal. Teghujo nak poie. Maklumlah dah bosa tak konal sanak sedagho.  Sonang ati omak ese, sobab eh ese nak ngikut.  Kok tak kang asik begaduh yo tinggal kek ghumah. Ese dan kakak ese tu pun bersiap siap apo yang patut. Malam tu kami tido awal. Selalu pun tido awal yo. Tapi aghi tu teraso awal eh..

Esok pepagi kito poie naik bas.

Tak dapek nak ese gambar’an doh suasana mulo mulo sampai tu, sobab tak ado aghang ese kona. Tompek pun tak ponah tengok gaso’eh. Maso tulah baghu nak kona Indok ese, adik pempuan abah ese dan suami dio serta anak dio yang nampak keporit sikit. Kekadang nampak berantai yo keporit eh. Apo ese ingat laie iyolah sungai dopan ghumah eh tu air eh dalam. Jalan nak poie keghumah dio ikut lorong tanah  kosong (sekarang tapak ghumah Ka’ap Teksi. Maso tu koba’eh dio masih bolon pencen askar laie doh.)

Potang tu kami ke Simpang Jelutong, ghumah arwah Abu (alang) adik abah ese tu. Boto boto kek simpang jelutong tu. Bolah baghuh tu, topi sawah.  Maso tu lopeh musim padi. Sawah toghang, nampak ghumah ghumah oghang kek Joghojak nun.

Malam tu kenughi di rumah arwah tu. Tak ado yang ese ingat tontang kenughi tu doh.

Pagi esok eh tu, kami poie dalam semak seboghang jalan topi bukit tu untuk mandi.  Masok ikut loghong dalam somak  dan mendaki lobih kughang dua puloh langkah ke eteh bukit.  Ghupo’eh kek situ ado air bukit. Diompang oghang dengan batu batu. Jadilah macam pigi. Air eh sentiaso mengalir yo. Jeghoneh amek amek dan sojuk kan main.

(Kira kira penghujung tahun 80an kawasan tersebut dah diteroka oghang. Tanam pisang dan gotah. Hilang sumber air mineral tu- Sudah tontu LAR selalu mandi kek situ dulu, sobab kek kodai abah eh dan Jokiden agak’an ese, tak tau LAR mandi kek situ- kok tahu ontah lah –ghobah la deh)

Semalam yo kami kek situ. Lobih kughang pukul 9 ko kul 10 pagi kami nak balik. Omak ese koba’an kek ese kito balik ikut jalan utan. Sumo setuju, akak ese setuju, ese pun setuju. Oghang tua ese ghisau takut ese tak setuju. (dah bosar gajah ni baghu ese tahu aposal kito kono ikut jalan utan balik ke Bayai – Ghupo eh abah ese tak ado duit lobih. Tompi kok ese tak setuju maghin tu, terpakso yo naik bas dan abah ese jalan kaki ikut utan sensoghang).

Sebolun balik, omak ese siap’an air dalam bocong. Tambah laie satu boto, boli kek kodai Alang Ghoman. Boli 2,3  kueh nak makan tongah utan nanti. (maso tu tokeh kodai simpang tu masih 2oghang- alang Ghoman dan Ongah Bakar- kongsi)

Kito pun mula perjalanan ikut Jeghojak masuk kanan, kek lopeh ompangan tu. Dalam 5 minit bojalan, lalulah didopan sebuah ghumah bosar. Ado oghang tua ditopi pagar ghumah’eh sodang menyanko ghumput. Dio nampak dan kona kami. Copek copek dio belolah ko pintu pagar lalu bukak pintu untuk bejumpo kami…..

 (BERSAMBUNG LAIN KALI – DALAM SIRI SINGGAH DI ompek tompek diJOGHOJAK – KEH KEH KEK..lotih dah.. ).