KENANGAN MENGUSIK JIWA

BUAT KAWAN-KAWAN  SAYA SERTAKAN SELOKA YANG DIBACAKAN PADA MALAM GALA DULU.

Batu Kikir jambatan bosi,
gulai udang sebelango,
bosa ea raso dalam hati,
dapek jumpo kengkawan lamo aiiiiiiii.

SMBK sekolah lamo kito,
dari tahun 69 sampai 74,
banyak cito suko duko,
sampai tuo ni masih tak lupo.

Baru-baru ni ese menjongah kek SMBK,
rupo ea SMBK dulu ngan sekarang jauh berbezo,
ese cari padang tompek kito main dulu dah tak ado,
library pulak ontah kek mano,
cumo yang masih ado kelas kito dulu,
masih kek situ.

Kito MCE pertamo tahun 74,
kito hebat 88.6% lulus banyak tahun cubo di pocah,
masih tak dapek.

Maso tu Halimah Ujang primadona first grader,
sembilan lagi member kito dapek gred 2,
ese pulak maso ambik keputusan pekso,
 abah ese terduduk kek bilik pengetuo
sobab ea dio tak cayo,
anak ea dapek gred duo.

(MASO SEKOLAH)
Rashid hari-hari kojo ea kotuk mejo,
sobab dio bercito-cito nak jadi drummer,
satu hari bunyi tu tedonga kek tuan pengetua,
hondap punyo hondap  pengetua dapek tangkap sorang,
pengetuo bagi penampar kek pangkkal telingo,
apo nak dikato...  Rashid punyo kojo.....  Iskandar yang kono.
bilo ese tanyo sodap tak penampar pengetuo,
dio cakap tak sakit doh....  goli-goli yo.

Member-member kito ado kek mano-mano,
kek kodah.. kek ipoh... kek kelumpo...  kek JB  ... kek melako,
 yang kek Pilah... kek Joseh.. kek Somban  pun ado,
tapi kadang-kadang susah nak nampak muko.

Badariah orang kampong ese Sg Jelutong,
 setahun sekali maso rayo pun tak ponah nampak batang hidung,
cumo kirim salam kek abah ea ketua kampong.

Salim maso tu begayo ngan ramput afro,
 seluar kombang bell bottom ke hulu ke hilir,
orangnya pemarah copek naik angin,
ponah nak bertumbuk ngan Mr Tham cikgu matematik.

Kawan-kawan kito sumo dah berjayo,
Rashidi dah jadi proffesor,
koba ea kek Uitm Melako.

Jalil pulak dah jadi Pengarah belio,
kek Bukit Jalil , Majlis Sukan Negaro,
Stadium Nasional tu macam dio punyo,
tapi dio tak apek halang Misbun beronti kojo.
(apo nak kato)

Aminah Sani sumpah ese tak ponak lupo,
sobab bilo dio pandang selatan nampak utaro,
dongan cito dio kojo setio usoho,
kek syarikat bosa ontah apo namo.

Mano duduk ea Majid kasbi,  Zakaria Kalam,  Norlia Karim, Fauziah Aziz,
Jugak Lian fatt, Batumalai, Chow Mew Khoon dll ?
Badarudin, Rosminah, Latifah Razak, dah jadi arwah,
samo-samo lah kito sedokahkan  Alfatihah.

Sarip pun sekarang dah sonang lenang,
keto ea berbuah-buah ...  duit ea tak dapek dibilang,
dio bukak restoran ke spitak Senawang,
kawan-kawan fikir bilo nak poi sobab dio charge mahal,
tolor setongah masah tujuh hinggit sebiji,
mengosal   Rashidiii...

Iskandar pulak tak berubah dari mudo sampai tuo,
kojo ea tak do lain buek orang ketawo,
dah tuo pun dio masih banyak kudrat kuek dayo,
takat 10 biji kelapo dio buleh angkek bilo-bilo,
kalau nak tau kelapo apo?   tanyo lah dio.

Pak Ongah bercinto maso form four,
Induk pulak maso tu tingkatan tigo,
hari-hari poi balik sekolah dalam bus Malay Transport duduk berduo,
Iyeh pun duo kali limo,
sobab cinto punyo pasal dio tak kiro adik member,
tapi eae tabik kek mereko berduo,
bercinto maso mudo koka sampai tuo....
bahagio......  bahagio.....

Ingat tak form teacher kito Mr Ramu Naidu?
dari mudo sampai ni dio macam tu,
Ustaz Nizar tak ponah nyombong,
walau dah pencen dio masih sambung,
sapo berhajat jumpo dio kek pejabat Agamo,
ambik borang..  confirm lulus punyo.

Cikgu Soyong koba ea dah aruah,
begitu juo cikgu Yusof dah di alam barzah,
ilmu yang dititip  totap dikonang,
berkatnya menjadikan siapa kita sekarang,
untukmu cikgu-cikgu yang disayangi,
terimalah Al-Fatihah dari kami,
semoga rohmu senantiasa mewangi.

Malam ini lautmu Telok Kemang,
lautmu berombak tenang,
bayumu membisik sayang,
pantaimu berlagu rindu,

ILHAM menyatukan ukhwah,
bekas putra putri SMBK,
dari jauh terpanggil datang.

Betapa manisnya malam ini,
dalam pelukan mesra dan tautan budi,
lantaran lamanya kita  terpisah,
oleh jarak ruang dan masa.

Saudara saudariku,
siapapun kita malam ini tiada beza,
dalam kesatuan kita tetap seperti dulu,
aku merindu gelak tawamu,
aku menyusuri resah gelisahmu,
nostalgia indah sentiasa terpahat,
yang tak mungkin kita ulangi.

( CANG CAPIT  tulang daieng,
patah paku patah puding,
cari aku di sebalik dinding )

Nukilan Ismail Md Isa.